Historia
FUNDASHON APSTENE TE MATRIMONIO
For di aña 1998 un grupo di boluntario ta bishita Kas Bruder Pius, un internat
kaminda e hóbennan tiner ku sali na estado ta biba. Nos ta duna guia spiritual i sosten na mamanan hóben pa nan sigui nan bida i funshoná optimalmente komo mayor en partikular i en general komo persona ku ta forma parti di e komunidat. Na aña 2001 nos a ser honrá ku e award di Wendell Girigorie komo Boluntario di aña.
Durante e añanan ku e grupo ta traha den e área aki, nos a nota ku e edat di e hóbennan ku ta sali na estado ta bahando i ku tin un oumento di embaraso i malesanan venériko bou di hubentut. Esaki a motivá nos pa bin ku un programa preventivo pa yuda redusí embaraso hubenil, infekshon transmití seksualmente (eo HIV) i tambe pa rekuperá norma i balor riba tereno di seksualidat.
Dia 24 i 25 di ougùstùs 2006, ATM (Apstené Te Matrimonio) a organisá pa algun skol dos dia di informashon den kua alrededor di 800 hóben di entre 11 pa 19 aña di edat a partisipá. E hóbennan a siña hopi di e programa. Dia 25 di ougùstùs 2006 anochi tabatin un Youthrally ku a tuma lugá na Because Entertainment Center. Tabatin mas ku 750 hóben presente, pero pafó tabatin un grupo mes grandi ku no por a drenta pasobra e sala tabata yen. Alrededor di 300 hóben a disidí pa ATM. Nos a realisá ku tin un interes grandi bou di e hubentut i nan mayornan. Dia 15 di sèptèmber 2006 nos a bolbe organisá un Youthrally na WTC. E biaha aki alrededor di 1200 hóben i mayor a yena e Exhibition Hall na WTC. E anochi aki tambe tabata un éksito rotundo. Hopi hóben a skohe pa “Save Sex” en bes di “Safe Sex”.
Mirando e interes pa un alternativa i e dekadensia grandi ku tin riba e tereno aki (solamente e tòp di e “ijsberg” ta sali den publisidat) nos a disidí di lanta un Fundashon dia 30 di mei 2007. E nòmber ta:” Fundashon Apstené Te Matrimonio pa un generashon nobo” (ATM).
E meta prinsipal ta:
- Ofresé un plataforma na e hóben na unda e por risibí informashon, papia i diskutí den un manera habri, sano i responsabel riba e tema di seksualidat.
- Stimulá balor propio i dominio propio serka muchanan di skol básiko i hóbennan.
- Rekuperá norma i balor bou di nos hubentut.
- Hasi nan konsiente ku nan por skohe pa ATM i duna nan e hèrmèntnan ku nan mester pa hasi esaki.
Nos vishon ta:
- Pa lanta un generashon nobo ku ta respetá norma i balor sano.
- Un generashon nobo ku lo disidí pa bisa NO na sèks pafó di matrimonio.
Nos ke alkansá esaki dor di:
- Duna informashon na skol, sentro di bario i otro institutonan.
- Emití un korant informativo tokante di ATM .
- Enbolbí hóbennan ku ta ATM pa train otro hóbennan.
- Organisá Youthrally i drama dos biaha pa aña.
- Lanta un klup pa “follow up” ku e hóbennan ku ta ATM.
E bentahanan di ATM ta entre otro:
- Hóbennan ku balor propio haltu no ta kai fásil pa tentashon di bisionan.
- Muchanan ku ta siña dominio propio i por dominá nan deseo seksual ta bira personanan ku un karakter stabil.
- Ku ATM ta prevení infekshonnan transmití seksualmente (eo Aids).
- E hóbennan ta bira mas konsiente di e diferensha entre amor i deseo seksual.
- Studiantenan lo tin nan mente liber di e preokupashon relashoná ku sèks iresponsabel i lo logra mas na skol i den bida (menos drop-outs).
- Ménos mama soltero i muchanan lo lanta den un famia kompletu: tata, mama i yu(nan)
- Nos lo tin personanan emoshonalmente ekilibrá.
- Hóbennan ku tabata seksualmente aktivo, lo komprendé ku nan mester stòp ku sèks parotin.
- ATM ta yuda kombatí pobresa.
- E sumanan grandi ku Gobièrnu (nos aporte na belasting) ta usa pa mama tiner i nan yunan, kuido médiko, etc. lo ser usá den edukashon i deporte.
Durante e añanan ku a sigui Fundashon ATM a presentá vários programa varia ku e meta pa informá i konsientisá riba e tereno di seksualidat:
Nos ta konvensí ku ATM: Apstené Te Matrimonio ta e úniko método ku ta 100 % sigur.